И покрај најавите дека денеска ќе продолжи судењето на обвинетите за петкратното убиство кај Смилковското езеро на 12 април 2012, познат и како случај „Монструм“, тоа е одложено за 17 април.

Директна причина за одложувањето е недоаѓање на јавниот обвинител, но според судијата причината можеби е поради тоа што СЈО пред два дена поднело барање за преземање на предметот „Монструм“ кое вчера им било доставено.

На минатото рочиште од повторното судење за овој предмет беше прочитан обвинителниот акт, при што обвинителот Наум Пановски рече дека остануваат на првичното, со кој обвинетите се товарат за тероризам. Тој прочита само едно од обвиненијата за случајот.

Адвокатот Насер Рауфи забележа дека било прочитано првичното обвинение од 26 октомври 2012 година, но не и тоа за Сами Љута кое во претходниот судски процес беше споено со обвинителниот акт за Алил Демири, Африм и Агим Исмаиловиќ и Езим и Хаки Азири.

По забелешката на адвокатот, новиот Судечки совет составен од судиите Огнен Ставрев и Осман Шабани, го прекина рочиштето и продолжението на судењето го закажа за денеска.

Четворицата обвинети за петкратното убиство кај Смилковско езеро, Агим Исмаиловиќ, Хаки Азири, Сами Љута и Фејзи Азири се бранат од слобода откако Врховниот суд го врати случајот на почеток.

Одбраната верува во позитивен епилог, а побара и СЈО да го презеде случајот.

„Постои опција СЈО да го преземе случајот бидејќи тоа се уште го истражува случајот, а и не е одлучено кој од обвинителите од организираниот криминал ќе го презентира, па мислам дека постои и оваа опција. Ако нема одложување од техничка природа, условно, мислам дека за четири седници ќе се затвори случајот во прв степен. Случајот наскоро ќе има епилог“, изјави адвокатот Насер Рауфи пред судењето.

Роднините на осомничените се надеваат на нивно целосно ослободување од вина. Тие веруваат дека доказите кои ги поседуваат двете обвинителства ќе ја потврдат невиноста на шесте осомничени лица.

Масакрот кај Смилковското Езеро се случи на 12 април 2012 година, на Велики четврток, пред големиот христијански празник Велигден, кога беа убиени момчињата Кире Тричковски, Филип Славковски, Цветанчо Ацковски, Александар Наќевски и рибарот Борче Стефановски.