Специјалното јавно обвинителство најостро ги демантира обвинувањата на судијата Панчевски дека при претресот на СЈО во неговиот дом истражител му го украл клучот. СЈО со налог издаден од Основниот суд во Гевгелија влезе во домот на Панчевски, а претрес изврши и во неговата работна канцеларија во Кривичниот суд. Панчевски преку медиумите објави и снимка од безбедносната камера во неговиот дом со која тврди дека случила кражбата.
„Сите дејствија преземени во рамки на предистражната постапка за време на претресот во домот се документирани, се снимаат видео и аудио, за одземените предмети се составува записник за привремено одземени предмети кој го потпишува и лицето во чиј дом е извршен претресот. По целосна анализа на материјалите ќе излеземе и со официјален став за ваквите наводи кои ги демантираме во целост“, велат од СЈО.
Како што потврдуваат од МВР, судијата во полициска станица во петокот пријавил дека од службено лице кое вршело претрес во неговиот дом извршена е кражба. Панчевски се жалел дека поради кражбата, стравува за својата безбедност. Неговиот адвокатски тим, по насоки на Панчевски, подготвува и кривична пријава.
„Се подготвува кривичната пријава во врска со одземениот клуч и таа ќе биде поднесена во согласност со законот“, наведува неговиот адвокат Дангов.
СЈО објави дека Пачевски е осомничен за три кривични дела оддавање на службена тајна, злоупотреба на службената положба и овластување и помагање во извршување на кривично дело. Преистражната постапка се води во насока на утврдување дали Панчевски го злоупотребувал системот за распределба на предмети АКМИС, односно дали местел предмети.
Инаку, заменик министерот за правда, Оливер Ристовски, изјави дека постојат сомневања дека постои паралелен АКМИС систем во Кривичниот суд, преку кој се местеле судските предмети кај подобни судии.