Обвинителката Ленче Ристовска за НОВА ги потврди информациите дека во домот на началникот на Петтата управа Горан Грујевски, кој е прво осомничен за уништување на опрема за прислушување, бил пронајден тефтер.
Ристовска не сакаше да ја коментира содржината на тефтерот, но посочи дека имаат одредени информации дека вработените во СЈО биле следени.
Како што претходно објави неделникот „Фокус“, во домот на началникот бил пронајден нотес со податоци од кои може да се заклучи дека агенти на УБК или приватно ангажирани професионалци ги следеле специјалните обвинители.
„Покрај името и презимето на обвинителите, во тефтерот стоеле податоци за местото на живеење, за релациите и контактите со други лица, соработниците, како и податоци за тоа на кои предмети се ангажирани обвинителите и како им напредува истрагата. Во белешките од нотесот се посочувале и сведоците со кои обвинителите имале контакти и информациите кој од испрашаните сведоци се согласил да изнесе сознанија, факти или докази. Сето ова отвора сомневања дека на овој начин владејачката партија преку своите истурени луѓе во МВР и во УБК, лесно можела да влијае врз сведоците на специјалното обвинителствo“, пишува неделникот „Фокус“.
СЈО го товари началникот дека заедно со уште четворица осомничени незаконски испланирал, спровел и ги сокрил трагите од уништување на два система за прислушкување со што државата е оштетена за 10 милиони евра.
Освен, Грујевски, во „Тврдина“ осомничени се уште двајца началници од УБК, екс-министерката за внатрешни Гордана Јанкуловска и уште едно лице вработено во МВР како документарка.