На Елизабета Канческа – Милевска не и беше одземен пасошот како што тоа го бараше Специјалното јавно обвинителство (СЈО) за определување на мерки за претпазливост за случајот „Тендери“ во кој првоосомничена е токму министерката за култура. Кривичниот суд Скопје го одби предлогот на СЈО.
Иако СЈО бараше на две лица осомничени во овој случај да им се одземат пасошите и да се јавуваат во судот еднаш неделно, по распитот што се одржа во петокот, судија на претходна постапка го одби предлогот како “неоснован”.
Во петокот Канческа – Милевска изјави дека се прави политички театар од страна на најголемата опозициска партија СДСМ, кој го изведува спроведува СЈО.
СЈО изјави дека „Одлуката на Основен суд Скопје 1 да не ги прифати барањата за претпазливост ќе ги обжалиме до повисокиот суд.“
Случајот „Тендери“ се однесува на изведување на градежни работи на Музејот за македонска борба и државност наречен музеј на ВМРО, од страна на градежното претпријатие „Бетон“ кое било фаворизирано. Осомничена е Канческа – Милевска и тројца членови на Комисија за јавни набавки од министерството. СЈО ги товари дека го оштетиле буџетот за над 1 милион евра.