Главната расправа за случајот во јавноста познат како „Тврдина 2“ на Специјалното јавно обвинителство во кое обвинети се седум лица за уништување на службена документација е одложено за 17 јануари, идната година. Првообвинет во овој случај е Горан Грујовски, началник во Управата за безбедност и контраразузнавање.
Судијката Лидија Петрова, позата од бомбите на опозицијата како „сваровски судијка“ на барање на адвокатите на одбраната, му наложи на СЈО за сите класифицирани докази да побара од УБК дозвола за декласифицирање на доказите за употреба во судска постапка, затоа што во пресудата немало да може да се наведе според кои докази е донесена пресудата.
Адвокатот на обвинетите Никола Додевски во своето образложение рече дека СЈО спротивно на членот 59 став 2 од Законот за класифицирани информации ги набавиле приложените докази и дека треба да бидат одбиени. Тој додаде и дека вака набавените докази не можат да се употребуваат во судска постапка, затоа што, за тоа треба посебна дозвола од институцијата која ги издала класифицираните документи.
Обвинителката Ленче Ристовска од СЈО, рече дека доказите се прибавени на законски начин и дека според законите и уредбите за класифицирани информации тие можат да се употребуваат во судска постапка од која јавноста ќе биде исклучена.
На рочиштето присуствуваа и пет обвинети од шестчлената комисија која била формирана во УБК, а која била задолжена, според обвинението, за незаконско уништување на 2.047 службени списи, од кои 22 се однесувале на незаконското прислушување.
По судењето, обвинителката Ристовска рече дека денеска биле информирани дека не била закажана главна расправа, туку за подготвително рочиште за главната расправа во кое се дебатирало за тоа дали постојат пречки да се постапува по доказите.
„Ние се обидовме да појасниме не постојат пречки, таквите докази да бидат изведени во понатамошната постапка. Се водевме од досегашната пракса на судот и упативме на тоа дека за судот не е непознато за тоа да постапува по класифицирана документација и дека законот не го забранува тоа, односно го дозволува тоа. Ставот на судот е дека ние треба да побараме дозвола од УБК за да ги употребиме доказите во судска постапка. Се надеваме дека ова ќе биде само кратко одложување и дека ќе го надминеме ова недоразбирање со судот. Со ваквата одлука на судот се доведуваат во прашање сите претходни постапки на судот во кои се постапувало по класифицирани документи. Очекуваме соработка од сите институции“, рече Ристовска.
Адвокатот Никола Додевски рече дека цел ден го изгубиле во судот за да се поправи обична процедурална грешка што ја направило СЈО.
„Не можам да објаснам зошто се направени вакви грешки. Ние баравме да се одбијат доказите кои се незаконски набавени, но судот направи отстапка и им дозволи да ги набават дозволите. Во овој случај, судот ги исправа процедуралните грешки на СЈО“, рече Додевски.
Првообвинетиот Грујовски не сакаше да даде изјава за медиумите.
Седумтемина во овој случај се товарат за фалсификување службена исправа, односно за уништување на документацијата поврзана со двата системи од нелегалното прислушување. Овие системи, според СЈО, лани биле уништени во нестандардна постапка. Се товарат и за незаконско уништување на документација која, како што информираа во СЈО, била потребна во истрагата за откривање на начинот на кој Управата за безбедност и контраразузнавање вршела прислушување.