Завршија двете јавни седници на Aпелација каде се разгледуваа жалбите на Специјалното јавно обвинителство за случаите „ТНТ“ и „Топлик“ кои бараа „бомбите“ да се користат како докази во овие случаи.
Обвинителите наведоа зошто нивната жалба треба да биде прифатена и истакнаа дека одбраната не може да се повикува на Европската конвенција за човекови права за заштита на приватноста, во која се вели дека јавната власт треба да ги штити граѓаните бидејќи самите лица обвинети во предметите биле дел од јавната власт.
-Дополнително првиот човек на УБК кој го вршел незаконското прислушување бил дел од јавната власт, член на политичката партија на власт, која уживала голема политичка моќ во времето кога се сторени прислушуваните разговори, истакна обвинителот Бурим Рустеми од СЈО.
Од ВМРО ДПМНЕ денеска реагираа дека „судот направи преседан одржувајќи рочиште без присуство на Миле Јанакиевски и неговата одбрана“.
-Преседанот да биде поголем, Миле Јанакиески ниту бил информиран, ниту бил уредно повикан на денешното рочиште што е спротивно на законските одредби. Со таквиот чин директно му беше оневозможено да се произнесе за случајот и грубо му беше повредено правото на одбрана загарантирано за секој граѓанин на Република Македонија. Со ова се суспендира и законот и Уставот на Република Македонија и уште еднаш се покажува дека наместо правен, се води политички процес, велат од ВМРО ДПМНЕ во соопштението.