По 48 часа обвинителите и истражителите од Специјалното јавно обвинителство ја напуштија Управата за безбедност и контраразузнавање. Тие пред малку си заминаа од УБК, а со себе ги зеле податоците од системот за следење на комуникациите, како што се податоци за Посебни истражни мерки (ПИМ) и книга за нивна евиденција. Односно, во рацете на СЈО сега се податоците кој наредил следење на комуникациите, со која цел и кое е лицето чиј телефон бил прислушуван.
Од СЈО испратија и официјално соопшти во кое се вели:
„Одземени се сите наредби за Посебни истражни мерки за следење на комуникациите и книгите за евиденција како и бараните компјутерски податоци од системот за следење на комуникација. Останува да се изврши дополнително одземање на компјутерските податоци за кои е потребна асистенција од надворешен експерт и очекуваме во наредниот период да се изврши и тој дел од наредбите“.
Останува да ги земат уште податоците за кои пристап ќе им овозможи претставникот на фирмата Ериксон, чии што уреди се исто така поставени во УБК како дел од опремата за следење на комуникациите.
Во следните денови СЈО треба да ги добие и тие податоци, со што ќе ги комплетира сите информации кои им се потребни за да истражат кој прислушувал и кој бил прислушуван.