„Скопски маратон 2017“ мина во знак на атлетичарите од Кенија. Киротич Кируи ја одбрани титулата кај мажите, Стела Јепнгетич Барсосио, пак, е сопственичка на новиот рекорд во женска конкуренција. Времето што Кируи го оствари изнесуваше 2:12,59 часа што е за 23 секунди послабо од ланското додека најдобриот резултат кај дамите сега е 2:33,42 часа.

Машкиот подиум го комплетираа уште два Кенијци. Втор низ целта мина Едвин Кипруто Кирва (2:16,15 часа), третото место го освои Самуел Мимутаи Киптум (2:16,32 часа). Најдобар македонскки натпреварувач беше Александар Кираџиев кој заврши како шести (2:41,38 часа).

Фото: skopjeinfo.mk

Идентичен национален состав имаше и женскиот подиум. Друштво на Барсосио, која во Скопје потврди дека е во одлична форма по триумфот и во Краков во минатата недела, ѝ правеа сонародничките Салина Џебет (2:44,19 часа) на второто место и минатогодишната победничката Гладис Јепкуруи Бивот (2:47,06 часа) на третото.

Во полумаратонската трка кај мажите доминираа домашните натпреварувачи. Дарио Ивановски, кој неодамна победи во Белград, беше најбрз на делницата од 21 километар на скопскиот асфалт (1:11,27 часа). Две минути и 43 секунди по него на целта пристигна Атанас Анчевски (1:14,10 часа), трет резултат имаше Милош Ранчиќ (1:16,07 часа).

Ако Кенијците ја оправдаа фаворитската улога во маратонот, олимпиското трио близначки од Естонија, Лејла, Лина и Лили Луик не препуштија ништо на случајот во полумаратонот во женска конкуренција. Атлетичарките од Тарту заеднички влегоа во целта со време 1:26,07 часа. Резултат по нивниот забележа македонската атлетичарка Адријана Поп Арсова.

Фото: skopjeinfo.mk

Богдан Цветановски од Македонија го освои првото место во трката на пет километри (17,35 минути) пред Србинот Илија Миленковиќ (18,23 минути) и домашниот натпреварувач Горан Мојаноски (18,30 минути).

Марга Бојаџиев победи на петкилометарската патека во женска конкуренција. Времето што притоа го оствари беше 20,22 минути. Рената Соколовска заостана 1,17 минути на второто место, Нагме Бургуч од Турција беше трета (22,19 минути).