Словачка и Унгарија денеска најавија дека нема да поддржат санкции против руските енергенси што Европската унија ги подготвува поради војната во Украина, велејќи дека се премногу зависни од тие испораки и дека нема непосредни алтернативи.
Комесарите на ЕУ расправаат за нови предлози за санкции, кои би можеле да вклучуваат постепено ембарго на руската нафта. 27-те земји-членки најверојатно ќе почнат да разговараат за нив утре, но може да поминат неколку дена пред да стапат на сила мерките и не е јасно дали нафтата ќе биде меѓу нив, а и дали Словачка и Унгарија ќе добијат право да се изземат.
Словачкиот министер за економија Ричард Сулик рече дека единствениот рафинер во земјата, Словнафт, не може веднаш да премине од руска сурова нафта на друг вид нафта. Промената на технологијата ќе трае неколку години, рече Сулик.
„Значи, ќе инсистираме на изземање, сигурно“, им рече Сулик на новинарите.
Словачка е речиси целосно зависна од руската нафта што ја добива преку нафтоводот Дружба од советската ера. Унгарија, исто така, е силно зависна, иако другите големи увозници на енергија, како Германија, рекоа дека можат да се справат ако ЕУ ја забрани руската нафта.
Унгарскиот министер за надворешни работи Петер Сијарто изјави дека земјата нема да гласа за какви било санкции „кои ќе го оневозможат транспортот на природен гас или нафта од Русија во Унгарија“. „Поентата е едноставна, снабдувањето со енергија на Унгарија не може да биде загрозено бидејќи никој не може да очекува од нас да дозволиме цената на војната во Украина да ја платат Унгарците“, порача Сијарто денеска од Казахстан. „Во моментов е физички невозможно Унгарија и нејзината економија да функционираат без руска нафта“, рече тој.
И покрај несогласувањето меѓу членките на ЕУ за новите енергетски санкции, претседателот на Европскиот совет, Шарл Мишел вети дека ќе ја „скрши руската воена машина“ со тоа што ќе ги оддалечи земјите на континентот од руските испораки на природен гас. Идејата е да се обезбедат алтернативни снабдувања на енергенси кои вклучуваат големи производители како Алжир, Катар и САД.
Тоа ги вклучува објектите за течен природен гас што се градат во северна Грција, а Мишел и водачите на четирите балкански земји ги обиколија денеска.
„Ние, исто така, ја санкционираме Русија за да извршиме финансиски, економски и политички притисок врз Кремљ, бидејќи нашата цел е едноставна: мора да ја скршиме руската воена машина“, порача Шарл Мишел денеска од Грција. (адаптирано од Асошијетед прес)