Словенија е голем поддржувач на евроинтегративниот процес на Северна Македонија, истакна Министерката за труд и социјана политика, Јагода Шахпаска по официјалната вечера на Вториот министерски состанок за вработување и социјални прашања меѓу ЕУ и Западен Балкан.
Состанокот се одржа во Брдо кај Крањ, Словенија а министерката имаше неформална средба со министерот за труд, семејство, социјални работи и еднакви можности на Република Словенија Јанез Циглер Краљ.
Шахпаска ја истакна вербата и очекувањето дека Република Словенија за време на претседателствувањето со Европската Унија уште повеќе ќе придонесе за конечно придвижување на Северна Македонија во нејзиниот интегративен процес и поскоро одржување на првата меѓу владина конференција.
Двајцата соговорници разговараа за приоритетите на двете земји, особено по предизвиците што ги наметна Пандемијата со Ковид-19, но и за продлабочување на меѓусебната соработка.
Словенечкиот министер Циглер Краљ оцени дека после пандемијата сите држави и во ЕУ и во Западен Балкан мора да се фокусираат на политики за младите кои ќе значат создавање услови за нивен побрз напредок и развој.
Министерката Шахпаска информираше дека Северна Македонија креира и имплементира системски политики и решенија со цел да им обезбеди услови на младите да останат во државата и тука да ја градат својата иднина.
Таа додаде дека Министерството за труд и социјална политика работи на повеќе нови законски решенија, како што е и Законот за работни односи, во кој ќе бидат имплементирани работата од дома, работата од далечина, флексибилното работно време со цел да излезе во пресрет на потребите на денешнината.