Ексградоначалникот на Гази Баба, Тони Трајковски не се појави на денешното рочиште во Кривичниот суд за случајот „ТНТ“. Синоќа пред полнок пријавил во полиција дека бил физички нападнат од две лица по претходна вербална расправија. Од МВР информираат дека работат на расветлување на случајот.

Тоа беше пречка за почнување на навремено почнување на рочиштето за судскиот процес „ТНТ“ кој се однесува на уривање на комплексот „Космос“ на Фијат Цаноски, во кој поранешниот градоначалник на Гази Баба е третообвинет. Според адвокат, Трајковски се наоѓал во болница.

Судијата Огнен Ставрев го контактирал докторот, кој му рекол дека е во добра општа состојба и е на пат кон дома. Притоа Ставрев даде рок од еден час за Трајковски да се појави во Кривичниот суд, бидејќи во спротивно ќе биде стражарно приведен.

Од Ургентниот центар во Скопје најавија дека за кусо време официјално ќе соопштат за повредите со кои се здобил ексградоначалникот Трајковски.

По неколку блокади на ова судење, судијата Огнен Ставрев сака да го заврши процесот деновиве, бидејќи на две поротнички им истекува мандатот и судењето ќе треба да почне одново.

Првообвинет во случајот „ТНТ“ е поранешниот премиер Никола Груевски, кој пребега во Унгарија каде доби азил, потоа поранешниот министер за транспорт и врски, Миле Јанакиески и ексградоначалникот на Гази Баба Тони Трајковски како логистика и други обвинети од општината.