Директорите на јавните здравствени установи во Клинички центар и Министерот за здравство спротивно на законот, донесоа одлуки за прекин на договорот за вработување на поголемиот број здравствени работници, односно здравствени соработници кои наполниле 64 години возраст и имаат 15 години пензиски стаж, реагира денес синдикатот на Клиничкиот центар во Скопје.
Синдикатот тврди дека некои директори на здравствени установи и министерот за здравство присилно праќаат медицински персонал во пензија, односно не го почитуваат нивното право со потпишана изјава да останат на работа до 67 години возраст.
„Директорите на здравствените установи и Министерот за здравство немаат законски основ за донесување одлука за прекин на работен однос на здравствен работник, односно здравствен соработник кој дал согласност за продолжување на договорот за вработување,
најмногу до 67 години возраст. Законот не им дава право на директорите на здравствените установи и Министерот за здравство со подзаконски акт, односно со формирање Комисија за анализа на податоците од Мој термин да донесат одлука за прекин на работен однос на оваа категорија работници најмногу до 67 години возраст, доколку тие дале согласност“, се вели во реакцијата.
Се наведува и дека ваквиот пристап без законски и јасно утврдени критериуми остава простор за селективни и дискриминаторски одлуки.
„Синдикатот на Клинички центар ја поддржува заложбата на министерот за здравство за вработување млади доктори и друг здравствен персонал, но во услови на недостиг и одлив на здравствен персонал од јавното здравство, сметаме дека тоа треба да биде дел од системско решение, а не на сметка на високостручен кадар неопходен за едукација на овие млади доктори. Најмалку треба да е причина и основ за донесување на одлуки спротивни на законот“, истакнаа засегнатите.
Синдикатот ги упати на поднесување на тужби. „Синдикатот на Клинички центар ги охрабрува сите здравствени работници и оние здравствени соработници кои дале согласност за продолжување на работниот однос најмногу до 67 години, и на кои им е врачена одлука за престанок на работен однос поради наполнување 64 години возраст и 15 години пензиски стаж, да поднесат тужба до судот при што во постапката по тужбите Синдикатот на Клинички центар ќе им даде заштита во остварување на нивните права. (Р.Н.)