Видео клипови од 15 минутното шоу на младите репрезентативци на Македонија осамнаа на социјалните мрежи по триумфот против Шкотска во Скопје
Со стихови од „Бисер Балкански“, играње оро во прес-центарот, пеење на препознатливите навивачки песни и скандирање на името на државата, младите фудбалери ја започнаа прославата на историскиот пласман на Европско првенство, во случајот за играчи до 21 година. Македонија, конечно, дочека да поздрави една своја селекција со учество на голем настан. Вечерва на „Филип Втори“ падна Шкотска со 2:0, а во прилог одеше и триумфот (4:2) на Украина над Исланд во Рејкјавик за местење на единствената добитна комбинација во завршното квалификациско коло.
Националната арена беше одлично пополнета. Како што и се очекуваше според резултатите претходно во циклусот и важноста на натпреварот. Секој еден што одвои средства од семејниот буџет за купување на билет и, нормално, време да мине неколку часа на отворено не зажали. Од почеток до крај од трибините на стадионот се емитуваше победничка енергија, флуид што допираше и до идните сениорски репрезентативци на Македонија. На нив, пак, не им требаше долго да возвратат, да ги стоплат срцата и дланките на околу 30.000 гледачи и „монтираат“ насмевки на нивните лица што во второто полувреме ги одржуваше бдеењето на мобилните телефони и следење на развојот во Рекјавик.
Исланѓаните на полувреме водеа со 1:0 што воопшто не беше поволно по составот на Благоја Милевски, но Македонија не загуби верба во Украинците како што не губеше ниту во своите играчи во изминатиот период. Еуфорично беше дочекан првиот абер за израмнување на европскиот север што за кратко се покажа залуден бидејќи голот на гостите беше поништен поради недозволена позиција. Атмосферата спласна меѓутоа не и надежта за која велат последна умира. Во второто полувреме нов клик за 1:1 на Исланд, овојпат точен. По него уште еден и уште еден и уште еден и забавата покрај Вардар можеше да почне.
Македонија направи сензација во овие квалификациите. Ги одигра дрско и храбро, им пркосеше на, милионски, вредните ривали во групата и на крај ги остави сите зад себе. Кон Полска зачекори од првото место во Ц друштвото, ја елиминира една Франција, Исланд, Украина, Шкотска и Северна Ирска, конкуренција што важи за извонредно силна. Ништо не ги поколеба Алексовски, Зајков, Барди, Николов, Радески, Бабунскки, Велкоски, Бејтулаи, Маркоски, Ангелов, Демири, но и клупата на која беа Шишковски, Муслиу, Ѓорѓев, Петковски, Костадинов, Мурат и Аврамовски кои беа на готовс да помогнат ако треба.
Квалификациите се завршени со само еден пораз. Беше доживеан на стартот што не делуваше демотивирачки туку напротив како да го разбуди инаетот во момците. Се издигнаа како феникс, се надминаа себеси, личното го ставија во функција на колективното, успеаја да ги соберат мислите и главите и почнаа да уриваат пречка по пречка, да решаваат предизвик по предизвик.
Во целта минаа без ниту еден пораз, со три реми и шест победи за вкупни 21 бод или еден повеќе од фаворизираните „триколори“ кои за Милевски имаат капацитет и за европски прваци и три повеќе од Исланд со кого влегоа рамо до рамо во решавачките 90 минути. Втората половина од табелата ја предводи Украина со 14 бода, Шкотска е претпоследна со 8, „фенерот“ заврши за Северна Ирска.
Квалификации за ЕП 2017
Група 3
Резултати, 10 коло: Македонија – Шкотска 2:0, Северна Ирска – Франција 0:3, Исланд – Украина 2:4.
Табела
1. Македонија 10 6 3 1 13:7 21
2. Франција 10 6 2 2 17:8 20
3. Исланд 10 5 3 2 13:9 18
4. Украина 10 4 2 4 14:12 14
5. Шкотска 10 2 2 6 8:17 8
6. С. Ирска 10 0 2 8 6:18 2