Амбасадорот Дејвид Гир, шеф на Делегацијата на Европската Унија и министерот за внатрешни работи Оливер Спасовски, денеска во Клубот на пратеници во Скопје го означија завршувањето на воспоставувањето и подготовката на системот за радио комуникација ТЕТРА развиен со значителна помош од ЕУ.
ТЕТРА е еден од светски применети стандарди во комуникациските системи, наменет за употреба од страна на полицијата, противпожарните служби, службите за итна медицинска помош и разните спасувачки служби.
– По петнаесет години имплементација и инвестиција од 22 милиони евра во опрема и вештини, Министерството за внатрешни работи сега може да работи со напредни комуникациски алатки, стои во денешното соопштение од Делегацијата на Европската Унија во Скопје.
Од 2005 година, ЕУ обезбедувала континуирана поддршка за МВР за подготовка и развој на дигиталниот мобилен радиокомуникациски систем (ТЕТРА). Помошта од ЕУ за развој на ТЕТРА се одвивала во четири фази во период од 15 години, обезбедена во рамки на програмата за интегрирано гранично управување во Северна Македонија.
– Поддршката од 22 милиони евра од ЕУ овозможи воспоставување на 106 базни станици кои обезбедуваат 93 проценти географска покриеност на територијата на земјата. Во исто време, овие базни станици ќе опслужуваат 10. 000 терминали кои ги користат и други институции. Сега, по целосно воспоставување на ТЕТРА, полицијата може поефективно да ја врши својата работа и да обезбеди подобра заштита на граѓаните и полицискиот персонал додека се бори против криминалот или спречува нелегални гранични активности. Со овој систем Северна Македонија останува поврзана со остатокот од Европа во борбата со нелегалните активности долж главните европски коридори и канали, се појаснува во соопштението.
Дополнително, како што стои во соопштението, ТЕТРА ќе стане еден од најважните комуникациски канали на унифицираниот систем за Европски број за итни случаи Е-112, кој треба да биде пуштен во употреба за неколку дена.