Со Раул Гонзалез ја освоија првата титула во Лигата на шампиони во 2017 година, со Роберто Гарсија Парондо неодамна ја освоија втората, а со Шпанецот ќе атакуваат и на трета. Давид Хозе Писонеро е назначен за нов тренер на „црвено-црните“. Договорот е потпишан на две години, соработката почнува во летниот период и со него ќе се влезе во мисијата за одбрана на тронот во еминентното клупско натпреварување на ЕХФ, но и во регионалната СЕХА лига и домашното првенство во сезоната 2019/20.
„Верувам дека имам некои слични карактеристики како Парондо како и стилот на игра што го негуваме. Горд сум што ќе бидам тренер на Вардар и што ќе бидам дел од Лигата на шампиони“, порача Писонеро.
Новиот вардаров тренер ја почна и ја заврши играчката кариера во Валјадолид. Во меѓувреме, една сезона мина во екипата на Кантабрија со која го освои првото издание на Светскиот клупски куп во 1997 година и две во Адемар Леон. Поради повреда мора да се пензионира на 30 годишна возраст во 2003 година. И почетоците на неговата тренерска кариера се врзани за Валјадолид каде ги мина последните две сезони.