Укинување на сертификатите сега би било апсолутно контрапродуктивно. Трансмисијата на вирусот е се уште на високо ниво, а имаме многу низок степен на вакцинација, нагласи д-р Злате Мехмедовиќ
Омикронот може да го избегне имунитетот постигнат од прележување на делта варијантата и може да го избегне и имунитетот кој е постигнат со вакцина, ако таа е примена долго време претходно. Затоа, единствен начин да се намали бројот на реинфекции останува вакцинацијата против ковид-19, вклучително третата доза, за која има многу студии кои укажуваат дека заштитата од инфекција се зголемува на над 80 проценти со нејзина примена, истакна денеска новиот претседател на Комисијата за заразни болести, проф.д-р Александар Петличковски.
Тој образложи на каков начин ќе работи Комисијата, која ќе заседава секој вторник, а по потреба и почесто.
– Новиот состав ќе ги следи научните сознанија за коронавирусот. Но ние нема да работиме според принципот „во Англија се фрлија маските, па и ние ќе ги фрлиме“. Специфични се условите во Македонија и не може еднострано да прифаќаме одлуки. Денес дискутиравме за почетокот на учебната година, скринингот во училиштата, за сертификатите и набрзо ќе излеземе со првите препораки, рече д-р Петличковски, кој се надева дека релативно кратко ќе трае ситуацијата и потребата за чести состаноци.
Портпаролот на Комисијата, д-р Злате Мехмедовиќ, рече дека нема да има промена како се користат сертификатите, бидејќи нивното укинување сега би било апсолутно контрапродуктивно.
– Сметаме дека на тој начин најдобро ќе се заштити популацијата која нема создадено имунитет. Трансмисијата на вирусот е се уште на високо ниво. Се наоѓаме во зимски месеци кога таа преносливост е дополнително олеснета и доколку сега направиме еден таков радикален чекор за укинување на ковид сертификатите, особено ако земеме предвид дека имаме многу низок степен на вакцинација, тоа ќе биде нешто што може дополнително значително да го оптовари здравствениот систем и сега таа мерка би била апсолутно контрапродуктивна. Затоа, таа нема да се разгледува во наредниот период, додека се уште сме во ваква кризна состојба, додаде д-р Мехмедовиќ,