На ниво на цела Македонија, веќе се собрани потребните потписи за поднесување иницијатива за измени во законите и подзаконските акти до Собранието за подобрување на условите на семејствата на лицата со посебни потреби.

Како што информира Зоран Мијалков од невладината организација „Сплотени срца“, акцијата, на нивно изненадување се одвива многу добро и граѓаните никогаш не биле посплотени.

– Сигурен сум дека пратениците ќе ни излезат во пресрет бидејќи се работи за деца и возрасни лица со посебни потреби. Нашите барања не го оптоваруваат Буџетот на Република Македонија. Со акцијата се гледа дека никогаш не сме биле посплотени како народ, ние конечно имаме надеж и се надеваме дека нема да ни ја срушат, вели за НОВА, Златко Мијалков.

Планот е акцијата да продолжи да се одвива на ниво на цела Македонија до петок за да се соберат уште повеќе потписи од потребното, а потоа родителите и децата ќе продолжат според првичната замисла, со уште едно симболично кампување во паркот Жена Борец спроти Собранието.

Од 20 до 23 април и секој нареден месец до формирање на нова Влада тие ќе кампираат пред Собрание, а потоа ќе одржат мирен собир по формирањето на Владата, со цел да ги потсетат политичарите, колку луѓе се засегнати од овие проблеми.

Меѓу барањата се обезбедување иднина на децата по смртта на родителите, и тоа преку нивниот имот, кој би ѝ го отстапиле на државата, а за возврат таа да се грижи за нив до крајот на животот, со обезбедување пристојни услови.

Родителите бараат отворање на дневни центри кои би се грижеле за нивните деца, за да добијат време во кое ќе можат да заработуваат за живот а со тоа да не бидат социјални случаи.

Тие бараат и и да се избрише старосната граница од 26 години, по која во повеќе закони им се ограничува државната помош на лицата со посебни потреби. Така, до 26 годишна возраст лице со пречки во развојот има право на бесплатни прегледи и лекување, како и право на посебен додаток, но по навршување на оваа возраст, лековите не се бесплатни, а го губат и правото на посебен додаток.