Собранието денеска треба да ја одржи 8. седница на чиј дневен ред се Предлог на завршната сметка на Буџетот на РМ за 2016 година, повеќе закони поднесени од опозицијата и годишните извештаи на повеќе институции.
Нема информација дали денеска ќе има ново продолжение на шестата седница, на која точка на дневен ред е разрешувањето на државниот јавен обвинител Марко Зврлевски.
Вчера, претседателот на Собранието, Талат Џафери, го прекина продолжението на собраниската седница откако координаторот на една од пратеничките групи на ВМРО-ДПМНЕ, Илија Димовски, повторно побара пратениците да прекинат со работа во 18 часот бидејќи голем дел од нив сакаат да го одбележат верскиот празник Павловден со своите семејства.
Пратениците на денешната седница треба да расправаат по предлог законите за изменување и дополнување на Кривичниот законик во прво читање, како и Предлог – законот за дополнување на Законот за извршување на Буџетот на Република Македонија за 2017 година, по скратена постапка.
На дневен ред се и предлог закони во прво читање поднесени од пратеници од опозицијата како што се Предлог- законот за докторска дејност, Предлог-законот за дополнување на Законот за исплата на платите во Република Македонија, Предлог-законот за изменување и дополнување на Законот за извршување, Предлог-законот за изменување на Законот за аудио и аудиовизуелни медиумски услуги и Предлог-законот за изменување на Законот за јавното обвинителство.
На оваа седница ќе бидат разгледани и годишните извештаи на повеќе институции.