За да му се одземе пратеничкиот мандат требаше најмалку 80 пратеници да гласаат „за“.
На денешната собраниска седница се гласаше без да има дискусија.
Комисијата за мандатно имунитетни прашања пред два дена му препорача на Собранието да му го одеземе мандатот на Груевски, откако Судот достави допис до Собранието дека пратеникот е осуден на двегодишна затворска казна за „Тенк“.
Пратениците од парламентарното мнозинство сметаа дека затворската казна на Груевски го прави недостоен за врешење на пратеничката функција. Против гласаа и пратениците од независната пратеничка група на ВМРО ДПМНЕ.
Никола Груевски не присуствуваше на собраниската седница.
Пратеничкиот мандат не го заштитува Груевски од издржувањето на затворската казна. Неговото отсуство од Собранието ќе се смета за оправдано и тој ќе добива пратеничка плата.
Груевски не замина во затвор
Вчера истече последниот рок до кога Груевски и неговите адвокати можеа да поднесат жалби по решението на судија за извршување на санкции со кое се одби молбата на Груевски за одложување на затворската казна.
Од Судот за НОВА ТВ изјавија дека ќе се чека да пристигнат сите жалби пред да заседава Кривичниот совет. Адвокатите на Груевски потврдија дека во понеделникот попладнето ги испратиле жалбите до Судот преку пошта и тие стигнаа во Судот завчера.
Според најавите од адвокатите Груевски и сам ќе поднесел жалба, за што рокот беше до вчера. И тој има можност да ја испрати по пошта и жалбата да стигне до Судот по два дена. Дури потоа ќе заседава Кривичниот совет, кој треба да одлучи по жалбите во рок од 72 часа.
Доколку Кривичниот совет ги отфрли сите жалби, во одлуката ќе наведе и термин кога Груевски треба да се јави на издржување на затворската казна.
Целата оваа постапка, го одложи издржувањето на затворската казна. Според упатниот акт, Груевски вчера требаше да се пријави во Шутка на издржување на затворската казна од две години за случајот „Тенк“.
Во меѓувреме Груевски се обидува да остане на слобода и преку Врховниот суд од кој бара вонредно преиспитување на пресудата. Откако поранешната министерка за внатрешни работи Гордана Јанкулоска, која е исто така осудена во Тенк поднесе жалба до Апелација, целосната документација за предметот треба да биде испратена до Врховниот суд.