Според СОНК, членовите на Синдикатот сакаат кризата во Македонија да заврши што побрзо а да се пролонгира.
– Ја известуваме целокупната македонска јавност дека сме зачудени од изјавата на Претседателот на СДСМ во врска со неговото повикување на синдикатите во некаков народен фронт, кој ќе го формирал. Изјавата на Зоран Заев е невиден преседан во политичкото делување, не само во нашата држава, туку и пошироко во демократска Европа. Преседан, кој не се случил уште од времето на болшевизмот, се вели во соопштението до медиумите испратено од СОНК.
Оттаму до синдикатите порачуваат дека имаат своја област на делување, која не е партиска политика.
– Во изјавата на Претседателот на СДСМ, се направени тешки повреди на неколку закони. Со неговиот повик до наставниците и професорите да се вклучат во најавениот народен фронт, директно се крши со закон забранетото политичко делување на вработените во образованието во сите степени, се дополнува во соопштението.
Синдикатите од Конфедерацијата на слободни синдикати на Македонија и синдикати од Сојузот на синдикати на Македонија, бараат Заев да се извини бидејќи според нив, упаднал во основите на демократското општество.
– Ваквиот преседан на Зоран Заев може да предизвика огромни социјални и економски последици и затоа лидерот на СДСМ мора да престане со секакво мешање во работата и делувањето на синдикатите во Република Македонија. За ваквото незаконско делување на лидерот на СДСМ ќе ги известиме сите синдикални организации на европско и светско ниво, во кои се членки синдикатите од Република Македонија, дополнува СОНК.
Тие сметаат дека Заев е еден од најодговорните учесници и иницијатори на кризната состојба во која се наоѓа државата и го повикуваат да учествува на изборите закажани за 5.јуни.