Судското рочиште за случајот “Сопот” повторно е откажано. Отсуствуваше судијата што го води процесот. Продолжението е закажано за 9 октомври. Специјалната обвинителка, Фатиме Фетаи, рече тогаш ќе се откријат сите детали околу случајот и начините како ќе се продолжи со овој случај.
Ова рочиште требаше да биде прво откако Специјалното јавно обвинителство го презеде предметот.
Во шестмесечниот извештај што специјалната јавна обвинителка Катица Јанева го достави до Собранието, наведе дека извршила увид во списите од предметот и дека доставила барање за дополнително да и се достават списи.
Во случајот „Сопот“, единаесет жители од истоименото кумановско село, беа осудени за тероризам и добија вкупно 150 години затвор.
Се товареа дека во март 2003, подметнале експлозивна направа на локалниот пат Сушево – Сопот. При експлозијата загинаа двајца припадници на полскиот контингент на НАТО и еден македонски цивил.
СЈО го бараше овој предмет бидејќи има јавно објавени прислушувани разговори, и со цел специјалната обвинителка да утврди дали е надлежна и за овој предмет.
Во еден од прислушуваните разговори, кои ги објави СДСМ, има разговор меѓу поранешната министерка за внатрешни работи Гордана Јанкулоска и тогашниот директор на тајната полиција Сашо Мијалков, за случајот „Сопот“. Според снимката, Јанкулоска му сугерира на Мијалков дека за случајот треба да биде консултиран и тогашниот премиер Никола Груевски, за да се види како да се продолжи со овој чувствителен случај, при што и двајцата признаваат дека претходната пресуда со која беа осудени обвинетите, се потпира на „тенки докази“.