Предлог-мерките на Комисијата за заразни болести за невакцинирани лица во јавниот сектор и за здравствените работници, како што најави министерот за здравство Венко Филипче, денеска ќе бидат на дневен ред на состанокот на Главниот кризен штаб, а потоа и на седница на Владата.
Согласно предлог-мерките, сите вработени во јавниот сектор, во локалната самоуправа во сите институции, за одење на работно место ќе треба да прикажат потврда за најмалку една примена доза на вакцина или да имаат негативен ПЦР тест кој ќе важи најмалку 72 часа, а ќе биде направен на сопствен трошок. Оние кои го прележале вирусот ќе приложат потврда за прележан ковид-19, не постар од 45 дена, а доколку не можат да примат вакцина, ќе треба да имаат потврда од лекар-специјалист.
Покрај тоа, се предлага вакцинацијата да биде задолжителна за сите здравствени работници, а мерките треба да стапат на сила по 10 дена од усвојување на Влада, за граѓаните да имаат време да се вакцинираат и 30 дена за здравствените работници кои сè уште не се вакцинирале.
Препорака е кон овие мерки да се приклучат и приватните компании, со цел да се заштитат производствените капацитети и целокупниот економски процес во земјата.
Бараме да се ажурура процесот за спроведување на контрола на здравствените сертификати, користејќи ги електронските алатки на европските сертификати преку апликација која го прикажува вистинскиот QR код и ја контролира неговата валидност. Ова е мерка со која очекуваме значајно да се зголеми опфатот со вакцинацијата, изјави министерот Филипче кога ги објави предлог-мерките и додаде дека го следат примерот од останатите држави од регионот и од Западна Европа каде се применуваат мерки сѐ повеќе рестрикции за невакцинираните.
Во моментот, државата располага со 470.000 дози на вакцини на „Фајзер“ и 20.000 на „АстраЗенека“. Се очекува да пристигнат уште 200.000 вакцини на „Фајзер“ како донација од Италија, со рок до средината на следната година.
Според вчера објавените податоци на Институтот за јавно здравје (ИЈЗ), од направени 2.633 тестирања се регистрирани нови 389 случаи на ковид-19, починаа 18 пациенти и оздравеа 317.
Бројот на активни ковид случаи во земјава изнесува 8.535 случаи од кои најголем број (3.908) во Скопје. Вкупниот број ковид-дијагностицирани лица во земјава од почетокот на епидемијата изнесува 212.220, бројот на оздравени пациенти е 196.249, а на починати е 7.436.