За генерален секретар на Советот на Европа, кој ќе биде избран во јуни, потврдени се тројца кандидати – Дидие Рејндерс од Белгија, Естонецот Индрек Сар и Швајцарецот Ален Берсет. Поранешниот претседател на Швајцарската Конфедерација Берсет има добри изгледи да биде избран на таа функција, пишува денеска весникот „Ноје цирихер цајтунг“.
Весникот потсетува дека Советот на Европа е најстарата паневропска организација, но оценува и дека оваа организација има проблем со тоа што луѓето многу малку знаат за неа. За разлика од Европската Унија, Советот на Европа не може да донесува обврзувачки закони, туку само конвенции.
„Таа организација не ја ни следи идејата за европска интеграција, туку ги обврзува своите членови да ги почитуваат човековите права и разбирањето меѓу народите. „Свеста на Европа“ така го нарече еден од основачите, поранешниот германски канцелар Конрад Аденауер“, пишува весникот.
Берсет, социјалдемократ кој беше член на Федералниот совет, односно владата на Швајцарската Конфедерација и според системот на ротација во 2023 година и нејзиниот претседател, ќе биде првиот Швајцарец на чело на Советот на Европа.
Еден од спротивставените кандидати, речиси непознатиот поранешен министер за култура на Естонија, Индрек Сар, има многу мали шанси, оценува весникот.
„Другиот, Дидие Рејндерс, сè уште е комесар за правда во Европската комисија и претходно извршуваше важни министерски должности во Белгија. Сепак, тој 66-годишник можеби е малку фрустриран. Тој веќе еднаш се кандидираше за генерален секретар на СЕ во 2019 година, а новата кандидатура следеше дури откако неговата либерална партија одби да го стави на листата на кандидати за овогодинешните европски избори“, наведува весникот.
Затоа, според мислењето на весникот, „динамичниот полиглот Берсет, кој има само 51 година, би можел да биде успешен“ кога во јуни Парламентарното собрание на Советот на Европа ќе го избере наследникот на досегашниот генерален секретар, Хрватката Марија Пејчиновиќ-Буриќ.