Советот на Град Скопје на денешната петта седница треба да расправа за предлог-одлуките за утврдување на тарифата за снабдување со вода за пиење, за тарифата за собирање и одведување урбани отпадни води и за утврдување на тарифата за прочистување на отпадни води на ЈП „Водовод и канализација“ за периодот од 2018 до 2020 година.
Жителите на Скопје според предлогот на ЈП „Водовод и канализација“ ќе плаќаат за вода за пиење и отпадни води 28,67 денари за метар кубен, што е за 0,72 денари пониска од сегашната цена, но на сметките ќе се додадат уште по 2,04 денари за прочистување на отпадните води.
Со тоа сметките за оваа комунална услуга ќе бидат повисоки, но како што појасни градоначалникот на Скопје Петре Шилегов, тоа зголемување се должи на оваа нова ставка, додека жителите на главниот град и натаму ќе имаат најевтина вода, бидејќи нејзината цена се намалува.
-Согласно со европската регулатива, на Град Скопје му е додадена и трета точка која влијае на формирањето на цената, а тоа е тарифа за прочистување на отпадните води од две прочистителни станици, едната на реката Лепенец и другата на Вардар. Ние се одлучивме за најниската понудена цена од Регулаторна комисија, а тоа е сметката да се зголеми за 2,04 денари за кубен метар, изјави Шилегов минатата недела.