Советот на јавните обвинители денеска на седница ќе ги разгледува поднесените пријави на огласот за Јавен обвинител на Република Македонија.
Во соопштението, се наведува дека по седницата Советот ќе даде мислење за сите пријавени кандидати на огласот што ги исполнуваат условите согласно законот.
Владата на РМ на 20 октомври ги достави апликациите на кандидатите за јавен обвинител до Советот на јавни обвинители.
На огласот за државен јавен обвинител пријавени се 23 кандидати.
Кои се кандидатите
Од позвучните адвокатски имиња се пријавиле: Ѕвонко Давидовиќ, Александар Тортевски, Еленко Миланов, Тони Менковски, Арбен Гоља, Кирил Смичковски, потоа, поранешниот судија Валентин Зафировски, поранешниот обвинител Александар Наков, судијата д-р Лазар Нанев…Од редот на обвинителската фела, кандидатура поднел и членот на Советот на јавни обвинители и заменик во Републичкото јавно обвинителство, Љупчо Јовевски, како и обвинителката од организиран криминал, Лидија Раиќевиќ. На листата на пријавени се и нотарката Лорија Ваневска, Сефула Османи, Крсте Крајовски и други.
Во правосудните кругови најголеми шанси му се даваат на Јовевски, како човек од „внатре“, кому добро му се познати проблемите на фелата. Јовевски претходно работеше и како судија и четири години беше претседател на Основниот суд-Скопје 2. Добро котираат и адвокатите Давидовиќ и Тортевски, но клучниот избор ќе зависи од тоа дали ќе се оди на внатрешно или надворешно решение.
Постапка за избор
Советот на јавни обвинители на барање на Владата во рок од 15 дена треба да и достави позитивно или негативно мислење во писмена форма за сите пријавени кандидати на огласот што ги исполнуваат условите согласно законот.
Владата, пак, потоа до Парламентот доставува предлог за именување на јавен обвинител од пријавените кандидати, за кои Советот дал позитивно мислење.
Во случај Советот на јавни обвинители во рок од 15 дена ако не даде мислење за предложените кандидати, течат нови 15 дена. Доколку и тогаш не се изјасни, тогаш се смета дека мислењето на Советот е позитивно.
Доколку Советот за ниту еден од кандидатите не даде позитивно мислење, тогаш Владата може да му предложи на Собранието да го повтори огласот.
Владата на седница ги разгледува кандидатите, вклучително и мислењето од Советот на јавни обвинители и треба да донесе одлука за еден од кандидатите за кој претходно постои позитивно мислење од Советот. По тоа одлуката оди во Собрание како предлог решение, а истовремено се доставува и мислењето на Советот на јавни обвинители. За именување на јавен обвинител Собранието на РМ одлучува со просто мнозинство од 61 глас.
Мандатот на државниот јавен обвинител е шест години со право на повторно именување.
Новиот државен јавен обвинител треба да дојде на местото на Марко Зврлевски кој беше разрешен од Собранието на 17 август годинава. До назначувањето нов јавен обвинител, времено функцијата ја извршува Лилјана Спасовска.