Хрватската ракометна репрезентација се вброи во редот на оние кои со победа го почнаа својот настап на Светското првенство во Франција. Иако потешко одошто и самите очекуваа, сепак, „коцкестите“ на крајот триумфираа против Саудиска Арабија со 28:23 (12:11). Саудијците, особено во првото полувреме, се покажаа како тврд орев, но немаа сила ниту капацитет за нарушување на сметките на фаворизираните Хрвати.
Вардарецот Лука Циндриќ беше најефикасен во составот на Жељко Бабиќ со шест гола, пет постигна Домагој Дувњак, по четири пати погодија Ловро Михиќ и Мануел Штрлек. Кај поразените, чиј предводник е Ненад Кљаиќ, прв стрелец беше Мојтаба Асласем со пет гола.
Европскиот шампион Германија ја оправда улогата на фаворит во дуелот со Унгарија и славеше со 27:23, изненадување приреди Чиле со победата над Белорусија со 32:28.
Скандинавските селекции во групата Д не оставија ништо на случајот. Данска со 11 гола разлика ја совлада Аргентина (33:22), а Шведска беше уште поубедлива во средбата со Бахреин (33:16). Египет ја доби азиско-африканската пресметка со Катар со 22:20.
СП во ракомет
Група Ц
Хрватска – Саудиска Арабија 28:23
Германија – Унгарија 27:23
Белорусија – Чиле 28:32
Група Д
Данска – Аргентина 33:22
Шведска – Бахреин 33:16
Катар – Египет 20:22