Актуелниот европски ракометен шампион Германија ги заврши настапите на Мундијалот во Франција, откако загуби од селекцијата на Катар која приреди вистинско изненадување и славеше победа од 20-22.
Германија водеше во најголемиот дел од натпреварот, но Катар со фуриозен финиш дојде до голема победа. Во првото полувреме беа постигнати само 19 голови, а Германците имаа минимална предност 10:9, со што остана вторите триесет минути да го решат патникот во следната рунда.
На 15 минути до крајот, Германците имаа водство од четири гола разлика 17:13. Катар постепено ја намалуваше предноста, а во последните четири минути направи серија од 4:0 за на крајот да слави со 22:20.
Катар во четвртфиналето ќе игра против Словенија која синоќа лесно со 32:26 ја победи Русија.