Заврши 25. Светско првенство во ракомет што го организираше Франција под слоганот „Фенаменал“. Заврши и распределбата на медалите. Златото го освои домашната репрезентација предводена од Дидие Динар, среброто ѝ припадна на Норвешка, тимот што ја елиминира Македонија во осминафиналето, бронзата ја понесоа Словенците. Селекцијата на Македонија е 15-та во конечниот пласман што беше во рамки и на реалните можности и очекувања.
Но, затоа Македонија го има најдобриот голгетер на првенството. Кире Лазаров замина од Франција како лидер на листата со 50 гола од 81 шут во шест одиграни натпревари, а на врвот остана и по големото финале.
Најмногу постигна против Тунис, во првото коло, 12, двоцифрен (10) беше и против Ангола, против Словенија реализира девет, со шест го заврши дуелот со Шпанија, седум запиша во ремито со Исланд и шест против Норвешка во нокаут фазата.
Ова е трет голем турнир на кој македонскиот капитен е најдобар стрелец. Првиот беше на СП 2009 во Хрватска каде постигна 92 гола во девет меча, на Европското првенство во Србија во 2012 година на кое 61 пат ги тресеше противничките мрежи во седум средби.
Втор на листата на СП во Франција, со 47 погодоци од 88 обиди, е Серџо Авелино Лопез од Ангола, трет е Тунижанецот Амин Банур со 45 од 84 упатени шутеви. Двајцата одиграа меч повеќе на шампионатот од македонскиот капитен.
Листа на стрелци на СП 2017 во ракомет
Кире Лазаров (Македонија) 50 гола
Серџо Авелино Лопез (Ангола) 47
Амин Банур (Тунис) 45
Кристијан Бјорнсен (Норвешка) 45
Никлас Екберг (Шведска) 43
Бјарте Мирол (Норвешка) 42
Сандер Сагосен (Норвешка) 41
Лука Циндриќ (Хрватска) 39
Федерико Фернандез (Аргентина) 39
Габор Сажар (Унгарија) 38, итн.