Македонската ракометна репрезентација влегува без притисок во вечерашниот дуел со Шпанија, четврти на Светското првенство во Франција. Примарната цел е дофатена – осминафиналето дефинитивно е осигурано по вчерашното реми на Словенија и Тунис (28:28) и како единствена задача пред „црено-жолтите“ во Мец сега преостанува само обидот за освојување на третото место во групата Б за разминување со домаќинот на турнирот во првото нокаут коло.
Шанса за тоа е Исланд (утре 17,45 ч.), противник кој пред стартот на првенството беше посочен како еден од трите за минување на групата покрај Тунис и Ангола. Тоа, сепак, не значи дека Македонија нема или не треба да се обиде да приреди изненадување против фаворизираната „фурија“. Во тој контекст и размислувањето и порака на Червар од Франција во пресрет на вечерашниот настап.
„Нема однапред да се откажеме. Ќе пристапиме во мечот со намера да извлечеме добар резултат. Можам да кажам дека Шпанците, играчки, повеќе ни одговараат од Словенците, а една од причините поради што го велам ова се побавните бекови што го имаат. Меѓутоа ако нештата тргнат во спротивна насока од посакуваната, тогаш ќе размислуваме на утрешнара средба. Сепак, ако реално согледаме, клучен за Македонија е натпреварот со Исланд“, истакна селекторот Лино Червар.
Не е исклучена можноста и за промена во тимот вечерва и прекоманда на некој од трите резерви на Червар на првенството. Голманот на Бенфика, Никола Митревски и кружниот напаѓач на Металург, Жарко Пешевски и левиот бек на австриски Ферлах, Ристо Арнаудовски и натаму очекуваат деби во Мец што некој од нив може да има уште вечерва.
„Направивме анализа на играта со Словенија. Грешките се посочени и се надевам дека нема да ги повториме. Особено не утре против Исланд“, нагласува селекторот.
Червар, меѓудругото, потсетува дека Македонија е дел од Светско првенство што е тип на спортски настан на кој не е потребна ниту еуфорија по победа ниту тага по пораз. Ова важи за позиција на тимот и за фаза на турнирот во која сè уште имаат отворени опции. За „црвено-жолтите“, во случајот, таа е борба за третото место.
Со вечерашниот дуел се заокружува четвртата рунда во групата Б по вчерашната победа на Шпанија над Ангола со 42:22 и нерешените 28:28 на Словенците и Тунижаните.
Утрешниот ден ги носи и средбите од петтото, последно, коло во групата во Мец. Програмата ја отвораат Тунис и Ангола од 14 часот, Македонија и Исланд ќе играат од 17,45 ч. и Шпанија против Словенија во дербито од 20,45 часот.