На Лино Червар не му се повтори Аргентина од СП 2003, на Македонија не ѝ се повтори ниту ЕП 2016 ниту квалификацискиот турнир во Гдањск за пласман на олимписките игри. Ракометниот мундијал во Франција се одвива по планираното сценарио. „Црвено-жолтите“ ја совладаа и Ангола со 31:22 за втора победа во групата Б и, речиси, обезбедено осминафинале иако до него има уште три меча. Првиот нареден е во понеделник (17,45 ч.) против селекцијата на Словенија.

Фото: francehandball2017.com

Македонија вечерва не препушти ништо на случајот, не дозволи комоција, не дозволи да потцени, а со тоа и да си ја искомпликува позицијата. Освен влезовите во двата дела од средбата со третата африканска репрезентација, сè останато функционираше како што требаше, се очекуваше, се посакуваше. Неколкуте промашени зицери и технички грешки на стартот набрзо се покрија. Националниот тим заигра на потребното  ниво, уфрли во повисока брзина и на одмор замина со плус пет (14:9).

Фото: francehandball2017.com

Воведот од продолжението повторно мина во знак на Анголците. Врзаа неколку гола во ситуации во кои Македонија беше без голман и се доближија на миус 2 (13:15). И тоа беше сè што се обидоа да направат за резултатско враќање во игра и внесување на некаква неизвесност во натпреварот. Остатокот од времето понуди еднонасочна ракометна претстава во која главната улога ја имаа момчињата во црвени дресови. Покажаа дека од нив ќе зависат најголем дел од нештата, покажаа дека квалитетот е на нивна страна и ја потврдија улогата на фаворити што ја имаа.

Фото: francehandball2017.com

Комотната разлика што се изгради и одржуваше му овозможи на Червар и да ги дозира силите за предизвиците што претстојат. Шанса добија сите 16 ракометари што влегоа во официјалниот записник и во листата на стрелци не се додаоа само голманот Кирил Колев, Стефан Дрогришки, Велко Маркоски, кој и онаа се користи само во одбрана и Мартин Нелоски. Дебито на големата сцена ќе остане засекогаш врежано во Мартин Поповски кој доби прилика во арената во Мец и ја зачини со една реализација.

Најефикасен поединец на средбата беше Кире Лазаров. Капитенот одново беше двоцифрен и, по 12-ката против Тунис во првиот меч, мрежата на Ангола ја „изрешета“ 10 пати. Гоце Георгиевски, кој го понесе признанието МВП, постигна пет гола, три даде Филип Лазаров, по два запишаа Дејан Манасков, Стојанче Стоилов и голманот Благојче Трајковски. Прв стрелец во поразената репрезентација беше Серџо Авелино Лопез со 5 погодоци.

Ангола – Македонија 22:31 (9:14)

Арена во Мец. Гледачи: 3.000. Судии: М. Гателис и В. Мазејка од Литванија.

Ангола: Гаспар (1 одбрана), Фигеира, Муачисенге 1 (8 одбрани), Агијар 1, Хебо 2, Муленеса, Антонио 3, Манеко 2, Тека, Насименто 3, Квинанга, Лопез 5, Пестана 2, Фереира 3. Селектор: Алесандре Диого Мачадо

Седмерци: 1/1. Исклучувања: 6 минути Загубени топки: 12

Македонија: Колев (9 одбрани), Трајковски 2 (2 одбрани), Манасков 2, Стоилов 2, К. Лазаров 10, Митков 1, Дрогришки, Талески 1, Миркуловски 1, В. Маркоски, Н. Маркоски 2, Георгиевски 5, Ф, Лазаров 3, Ојлески 1, Поповски 1, Нелоски. Селектор: Лино Червар

Седмерци: 6/6. Исклучувања: 10 минути. Загубени топки: 14

СП во ракомет

Група А, 2. коло

Бразил – Полска 28:24

Норвешка – Русија 28:24

Јапонија – Франција 19:31

Табела: Франција 4, Норвешка 4, Русија 2, Бразил 2, Полска 0, Јапонија 0

Група Б, 2. коло

Ангола – Македонија 22:31

Тунис – Шпанија 21:26

Исланд – Словенија 25:26

Табела: Словенија 4, Македонија 4, Шпанија 4, Исланд 0, Тунис 0, Ангола 0

Група Ц, 2. коло

Унгарија – Хрватска 28:31

Група Д, 2. коло

Египет – Данска 28:35