Прв пораз на Македонија на Светското ракометно првенство во Франција. По двете победи против Тунис (34:30) и Ангола (31:22), „цревно-жолтите“ загубија од Словенија со 22:29 (10:16). Кире Лазаров и овојпат беше најефикасен на натпреварот со девет гола од кои четири од пенал. Матевж Скок беше херојот на спротивната страна. Словенечкиот голман одбрани 14 удари и беше прогласен за МВП, по четири гола за победничката селекција реализираа Маргуч и Безјак.
Утре е нов слободен ден за Македонија тим пред двата последни меча во групата Б во Мец – во среда (20,45 ч.) против Шпанија и ден подоцна (17,45 ч.) против Исланд.
Словенечкиот состав покажа зошто беше четврти на Олимписките игри во Рио и покажа зошто важеше за фаворит во однос на Македонија. Беше подобар ривал во 60-те минути во арената во Мец што беа неизвесни само во првуте десетина. Се останато беше во знак на составот на Вујовиќ кој резултатско „бегство“ од три-четири гола умешно го одржуваше, го зголемуваше и не дозволи ниту за момент да биде загрозено.
Македонија потфрли во секој сегмент на ракометната игра. Грешките што се провлекуваа во првите два мунадијалски меча ги имаше и овојпат, но овојпат имаше и далеку поквалитетен противник што знаеше да казни се што доби како прилика. Свој ден немаа голманите, лоша беше играта во одбрана пришто Словенците добија простор колку сакаат. И максимално го користеа.
Ништо поразлично не беше ниту во нападот. Многу промашени удари, добар дел од нив и зицери, неколку погодени стативи и разбранетиот Матевж Скок кој го обезбеди дополнителниот мир на соиграчите. Затаи ефект од крилните позиции. Првенствено ова се однесува на првиот избор Манасков/Георгиевски кои постигнаа по еден гол (толку дадоа и замените Ојлески и Поповски). Со „единица“ во листата на стрелци завршија и Миркуловски, Талески, Н. Маркоски и Нелоски, друштво од кое за нијанса се издвоија Дрогришки со две реализации и Стоилов со три.
Првата меч топка за осминафинале отиде во неповрат. Пред Македонија се уште две во кои ќе се обиде да бод(ови) што ќе значат и сигурен пласман меѓу 16 најдобри на турнирот во Франција.
Третото коло во нашата група го отворија Исланд и Тунис синоќа со реми 22:22, а ќе го затворат Шпанија и Ангола вечерва (20,45 ч.).
Словенија – Македонија 29:22 (16:10)
Арена во Мец. Гледачи: 3.500. Судии: Ларс Гепел и Маркус Хелбиг од Германија.
Словенија: Скок (14 одбрана) 1, Кастелич, Благотиншек 3, Хегинман 1, Маргуч 4, Кавтичник 2, Јанц 3, Доленц 2, Цингесар 1, Потеко, Миклавчич, Кодрин 1, Габер 1, Безјак 4, Зарабец 3, Мацковшек 3. Селектор: Веселин Вујовиќ
Седмерци: 4/5. Исклучувања: 10 минути. Загубени топки: 10
Македонија: Колев, Трајковски (6 одбрани), Манасков 1, Стоилов 3, К. Лазаров 9, Митков, Дрогришки 2, Талески 1, Миркуловски 1, В. Маркоски, Н. Маркоски 1, Георгиевски 1, Ф. Лазаров, Ојлески 1, Поповски 1, Нелоски 1. Селектор: Лино Червар
Седмерци: 4/6. Исклучувања: 4 минути. Загубени топки: 6