Министерот за внатрешни работи Оливер Спасовски за нападот на починатиот ракометар Денис Тот пред дискотеката „Привилиџ“  вели дека ракометарот претходно имал лични недоразбирања со 19 годишната девојка која учествува во неговото претепување.

За случајот има две лица приведени, а по едно лице се трага. Тој додава дека за ова лице ќе има распишано централна, но и меѓународна потерница.

На прашањето дали истото лице можеби ја напуштило државава, Спасовски вели дека засега немаат такви информации.

– Најпрво сакам да отфрлам со индигнација се она што деновиве се пласира во јавноста за наводно сокривање на овој случај или застој во истрагата. Веднаш по добивањето на информацијата, која што не е добиена од лице место за нарушување на јавен ред и мир, односно за тепачката, туку истата е добиена дури од Клиничкиот центар во Скопје, нашите екипи излегоа кај Клиничкиот центар и тогаш започнуваат истражните дејствија. Во ниту еден момент немаме запирање се до моментот на целосно расчистување на случајот со поднесувањето на кривичните пријави, а тоа некаде во рок од 24 часа, изјави Спасовски на денешната прес-конференција.

За првото соопштение на МВР во кое беше наведено дека „нема видливи траги на насилство“ кај починатиот ракометар, Спасовски вели дека било изработено на основа на информацијата од Клиничкиот центар – Скопје.

– Полицијата располага со видео-снимка на која што детално се гледа како се одвива настанот. Но кој бил мотивот за нападот, тоа треба да го докаже истражниот орган. Ние според изјавите што ги имаме, имало лично недоразбирање помеѓу девојката и момчето, одговори Спасовски на новинарското прашање за тоа кои биле мотивите за нападот.