Инфраструктурните проекти во Арачиново во последните три години се реализираат во континутитет. Тука сме да се увериме дека градежните работи на канализациската мрежа се изведуваат според предвидениот план и утврдените рокови, истакна премиерот Оливер Спасовски, кој заедно со министерот Горан Сугарески денеска беше во работна посета на општината.
Спасовски информира дека работите на терен почнале интензивно кон крајот на јануари оваа година и веќе се завршени околу 55 отсто од канализациската мрежа, проект вреден 106 милиони денари. Паралелно работат две екипи на различни локации. Премиерот притоа изрази уверување дека со ова темпо, изградбата на примарната канализација за населеното место Арачиново во должина од над десет километри ќе заврши пред предвидениот рок, определен за март 2021 година.
„Кога пред три години се случија политички промени и кога некои се закануваа и предвидуваа федерализација и кантонизација, ние ветивме дека овде во Арачиново ќе изградиме канализација. Го ветивме тоа затоа што е недозволено населено место на десет километри од главниот град да нема канализациска мрежа во 21 век“, рече Спасовски и додаде дека во оваа општината најмалку се вложувало во време на претходната власт на ВМРО-ДПМНЕ и на ДУИ.
Спасовски потсети дека во Арачиново пред некое време завршија работите на новата современа општинска зграда и останува да се доуреди просторотот околу објектот и опремување на внатрешноста со канцелариска и со друга опрема. Се реновирало и старото училиште, а во новото е вграден модерен и енергетски ефикасен систем за греење.
Преку Бирото за регионален развој и Агенцијата за поддршка на земјоделство и рурален развој се изгради локалниот пат кон село Грушино, а се почнува со изградба на шеталиште и велосипедска патека со хортикултурно уредување во Арачиново. Спасовски информира дека се завршени и дел од работите на некои бунари, а дел од работите на останатите се одвиваат со што ќе заврши и проектот за автономното и непречено снабдување на резервоарите со вода за пиење во Арачиново.
Премиерот најави дека во Општина Арачиново ќе почне и изградба на прва градинка, која ќе биде најголема по површина и капацитет за згрижување на деца. Владата, потенцира Спасовски, и натаму ќе ја поддржува Општината и градоначалничката и додаде оти преку проектот за асфалтирање на локални патишта, Општина Арачиново има преку 600.000 евра од државата кои ќе бидат за реализација на инфраструктурни проекти.