Ништо нема да биде исто. Мерките што ги донесовме беа во насока за заштита на здравјето на граѓаните. Оваа ситуација нè затекна во посебна состојба на техничка влада и распуштено Собрание. Но, институциите се поставија на високо рамниште и презедоа активности што дадоа резултат. Ширењето на вирусот е линеарно и здравствениот систем е сè уште во кондиција да одговори на сегашната експанзија на вирусот“, рече премиерот на Владата, Оливер Спасовски на денешната онлајн прес-конференција на која се прави ретроспектива на состојбата во Македонија во присуство на ковид-19.
Факт е, вели Спасовски, дека „моравме да донесеме одлука да затворање на градинки, училишта, универзитети, а многу од компаниите што работат во поголема комуникација со граѓани, исто така мораа да прекинат со работа“.
„Подготвивме два сета на мерки. Првиот сет беше наменет за оние сектори кои беа погодени во воведниот налет на вирусот како транспортот, туризмот, занаетчиите, главно мали и средни претпријатија. Развојната банка на Северна Македонија веќе ги одобри договорите за бескаматните кредити што беа одобрени од Владата Условите ги исполнија 136 компании со 1.737 вработени и на нив им се одобруваат бескаматни кредити во вкупен износ од 1.263.079 милиони евра. Од овие 136 компании-апликанти, 96 отсто се компании до 50 вработени, што покажува дека средствата од бескаматната линија ковид-19 примарно ќе стигнат до микро и малите компании. Вториот сет е договори од кредитната линија од Посебниот кредитен фонд со цел намалување на последиците од коронавирусот ковид-19 го одобривме на седницата на Владата пред четири дена“, истакна техничкиот премиер.
На уште 118 компании со 1.116 вработени, посочи тој, е одобрено користење на бескаматни кредити во вкупен износ од 936.602 евра.
„Во првата и во втората група се одобрени вкупно 254 кредитни апликации во вкупен износ од 2,2 милиони евра за компании со вкупно 2,853 вработени. По структура од вкупно одобрените кредитни апликации, микро компаниите до 10 вработени учествуваат со 69 отсто, малите компании до 50 вработени учествуваат со 28 отсто, а средните компании до 250 учествуваат со 4 отсто“, истакна Спасовски.
По 14.500 денари за секој вработен во фирмите погодени од корона-кризата
„Мерката 14.500 денари по вработен е финансиска поддршка што за фирмите кои се афектирани од кризата предизвикана од коронавирусот претставува ликвидносна инјекција и помош за исплата на плати. Компаниите може да ја искористат мерката за да ги задржат тековните плати на вработените кои одат на работа, за да ги подмират целосните или најголемиот дел од трошоците за исплата на плати на работниците кои, поради кризата, не се на работа. Истовремено. може да користат и комбинација од мерката за поддршка за исплата на минимална плата и мерката за субвенција на придонеси за поголема плата. За таа цел ја донесовме Уредбата со законска сила за субвенционирање на исплата на придонеси од задолжително социјално осигурување за време на водредна состојба“, изјави Спасовски.