Министерот за внатрешни работи, Оливер Спасовски не размислува за оставка откако полицијата направи неколку безуспешни обиди да го пронајде осудениот екс-премиер Никола Груевски. Спасовски вината зошто Груевски стана недостапен за органите на прогонот ја гледа кај судската власт.
-Одговорноста барајте ја кај судиите кои не одредиле мерка притвор за човек кој е осомничен за повеќе кривични дела, рече Спасовски додавајќи дека полицијата работи врз основа на судските наредби.
Како што рече, одговорноста треба да се бара кај оние кои им дозволувале на лица за кои постои опасност од бегство, слободно да се движат.
-Замислете има притвор за тешка кражба, а за тешки кривични дела нема притвор. Полицијата работи врз основа на наредби од судот. Постојат мерки за обезбедување, а тие ги обезбедува судот, изјави министерот Спасовски.
Спасовски рече дека сите информации од истрагата МВР нема да ги објавува јавно.
-Но ова не е само за Груевски туку за сите лица. Законот за кривична постапка кажува како треба да се постапува со ваквите лица. Јас мислам дека ако следиме комуникации спротивно на закон како претходно, ќе имаме сериозен проблем. Го баравме Груевски во неговиот дом, ги проверувавме возилата. Доколку имаме налог ќе влеземе во секој објект. Врз основа на добиените информации, секако ќе постапуваме. Не очекувате веројатно да ставиме линк на плоштад и да ги споделуваме сите информации од истрагата со јавноста, рече Спасовски.
Одговарајќи на новинарско прашање, тој рече дека врз основа на изјавите од обезбедувањето што го имал Груевски од МВР, тие го оставиле во домот во четвртокот на 8 ноември во 23 часот. Тој појасни дека 24-часовното обезбедување е на негов повик.