Бегството на Горан Грујовски и на Никола Бошковски не е неуспех на македонската полиција, тоа покажува колку е труло македонското судство, рече министерот за внатрешни работи Оливер Спасовски, додавајќи дека одговорноста за бегањето на поранешниот директор на петтата управа и на неговиот соработник треба да се бара кај судиите.
„За ова треба да се понесе одговорност бидејќи беше оставено време овие луѓе да заминат, без разлика дали некаде се кријат во државата или надвор од неа. Ова треба да биде силна порака и многу голема поука за реформите што претстојат во правосудниот систем на Република Македонија“, рече Спасовски.
Тој истакна дека веќе е време да се побара одговорност од лицата што овозможуваат криминалците да се шетаат на слобода и да се одредуваат мерки што не можат да бидат ефектуирани во одреден временски период.
Спасовски денеска присуствуваше на состанокот организиран од СЕП во врска со мерките од Планот 3-6-9 кои се однесуваат на локалните избори.