Околу 100 приватни специјализанти му пишаа отворено писмо до премиерот Заев, со кое бараат и тие да бидат вклучени во решението од Министерството за здравство за исплата на плати. Тие велат дека се врши исплата на плати само за селектиран број на приватни специјализанти.
„Се наметнува прашањето, кои се докторите кои ќе земат плата? За исти потпишани договори различно се вреднува трудот на докторите кои приватно специјализираат под исти услови на Клиниките и Институтите во Скопје. Цела генерација од речиси 100 доктори е изоставена од ова право на исплата на плата за вложениот труд на Клиниките. Форсирањето за исплата на парични средства само за одредена група доктори е дискриминаторско. Ваквото решение претставува девалвација на трудот и личноста на докторите кои решиле останат во татковината. Плата мора да има за сите приватни специјализанти, друга опција не прифаќаме“, пишува меѓу другото во отвореното писмо на незадоволните специјализанти.
Минималните трошоци, кои секој специјализант ги покрива за една приватна специјализација чинат помеѓу 8000 и 13 600 евра. Специјализациите во просек траат 5 години за време на кои дипломиран доктор специјализант не прима никаков паричен надоместок за својата работа.
Портпаролот на Владата Миле Бошњаковски рече дека и на оваа група специјализанти ќе им биде понудено истото решение како на останатите или ќе бидат вработени. Ова им било соопштено и на средбата што ја имале со Министерот за здравство Филипче.