Невладината организација Фридом Хаус објави извештај за состојбата со демократијата во 29 земји во транзиција насловен „Земји во транзиција според кој Македонија не напредува односно сè уште е во категорија „хибридни режими“.
Портпаролот на Владата Душко Арсовски вели дека овој извештај се однесува на подолг период дури од 2017, пред формирање на Владата од СДСМ. „Од кога е на власт СДСМ, има многу подобри оценки во справувањето со корупцијата, Владата успеа да ја зајакне почитта кај населението и ги штити правата на секој граѓанин“, потенцира Арсовски.
Како што јави Гласот на Америка, на скалата од еден до седум, каде еден е најниско ниво на демократски прогрес, а седум највисоко, Македонија е рангирана со оценка од 3,5 за демократско владеење, 4,25 за изборен процес, 5,25 за граѓанско општество, 3, 25 за независни медиуми, 3,25 за независно судство, додека 3,00 за корупција. Генералната оценка за демократски прогрес изнесува 3,82 или 47 проценти.
Според „Фридом хаус“, тековната криза обезбедува можност да се направи ревизија на процесот на пристапување во ЕУ, и оти „Блокот треба конечно да ги започне пристапните преговори со Албанија и Македонија, притискајќи ја Бугарија да се откаже од приговорите“.
„Дефинитивно, ниту еден хибриден режим во регионот не успеа да ѝ пркоси на гравитацијата на сивата зона од 2002. Во овој период, Албанија, Македонија и Србија флертуваа со либералната демократија, додека Ерменија и Молдавија издржаа авторитарни епизоди, но сите се вратија на хибриден режим до 2021 година“, оценува извештајот.
Моментално, вкупно 11 држави се категоризирани како хибридни режими во „Нации во транзиција“.