Министерството за финансии, во соопштение до медиумите, синоќешниот протест на Шарената револуција пред барокното седиште, го осудува како вандалски чин при кој се оштетувал државен имот.
– Во однос на вчерашните протести пред заградата на Министерството за финансии, при кои беше оштетена со боја фасадата на зградата, би сакале да посочиме: „Министерството за финансии го почитува неприкосновеното право на граѓаните за мирен протест, но го осудува вандалското однесување на поединци кои оштетуваат државен имот изграден со парите на граѓаните на Република Македонија“.
Вчерашните протести беа планирани пред седиштето на Финансии каде што учесници во протестите подготвија говори во однос на контроверзната еврообврзница со која Владата ќе ја задолжи државата за нови 650 милиони евра.
Но силното полициско обезбедување не дозволи пристап до Министерството по што, барајќи алтернативни приоди дојде и до тензии помеѓу демонстрантите и полицијата поради недозволувањето да се одржи протест пред една од државните институции.
Шарената револуција, сепак, и покрај обидите за попречување, во многу мала доза, успеа да го остави својот белег врз барокната зграда со неколку балони полни со боја.