Мобилен тим на Царинската управа спречил шверц на 3590 таблети трамадол откриени во личен багаж на еден патник при контрола на автобус на граничен премин Табановце.
Случајот, соопштија денеска од Царина, е откриен на излез од државата, а автобусот сообраќал на редовна линија Македонија-Данска. Против патникот, инаку македонски државјанин, е поднесена соодветна пријава.
– Во моментот кога автобусот е ставен на мобилен скенер, при што секој од патниците го извадија својот личен багаж надвор од автобусот, патникот се обиде да го искористи моментот и ја фрли торбата преку жичаната ограда на царинскиот терминал Табановце. Во ова е воочен од страна на еден од инспекторите, при што веднаш беше тргнат на детална контрола. Во неговиот личен багаж, во ракави на блузи, ногавки на фармерки и во чорапи се откриени вкупно триста педесет и девет ленти со по десет апчиња Дорета коишто содржат 75 мг Трамадол хидрохлорид, соопштија денеска од Царинската управа.
Трамадолот е лек кој спаѓа во групата на аналгетици опијати, главен елемент кој го содржи е морфиум. Во медицината се користи како лек кој спречува/ублажува болки.
Трамадолот делува како слаб агонист, лачи сератонин (хормон за среќа) и лачи норадреналин т.е. норепинефрин (хормон кој спаѓа во групата на катехоламини). Често се комбинира со парацетамол поради фактот дека оваа комбинација делува по ефикасно во ослободувањето од болка.
Трамадолот во Македонија се почесто се злоупотребува, и тоа најчесто кај зависниците од хероин. Можe да се купи со рецепт од лекар но е лесно достапен и на црниот пазар.