Денеска во Белград, министерот за земјоделство, шумарство и водостопанство, Љупчо Николовски, имаше работен состанок со потпрeтседателот на Владата на Република Србија и министер за земјоделство, Бранислав Недимовиќ. На состанокот е договорено во следните седум до десет дена Србија за Северна Македонија да ја тргне забраната за извоз на пченица, пченка, брашно и масло за јадење.
„Во рамки на инструментите што ги овозможува иницијативата „Отворен Балкан“, со потпретседателот Недимовиќ, договоривме во следните 7 до 10 дена Србија за Северна Македонија да ја тргне забраната за извоз на пченица, пченка, брашно, масло за јадење и да почне испораката за количините коишто се договорени помеѓу економските партнери помеѓу двете земји. Сите договори на нашите економски партнери од сите стопански комори ќе бидат реализирани. За договорените количини ќе биде испратено и писмо од нашиот премиер до премиерката на Србија“, изјави Николовски
Николовски упати порака до граѓаните, како што рече, да бидат смирени, бидејќи Македонија ќе има доволни количини од овие стратешки производи и суровини. Во меѓувреме, како што беше речено, државата работи и за изнаоѓање на алтернативни пазари за македонските производи.