Грчкиот премиер Киријакос Мицотакис во понеделникот потврди дека Грција се стреми конкупување на напредни борбени авиони Ф-35 произведени од САД и дека водечки американски одбранбен изведувач се обидува да инвестира во воздушната индустрија на земјата, пишува Катимерини.
„Ќе го започнеме процесот за набавка на ескадрила од авиони Ф-35 и се надеваме дека ќе можеме да го додадеме овој фантастичен авион во грчкото воздухопловство пред крајот на оваа деценија. И јас сум среќен што во петокот Локхид Мартин официјално го изрази својот интерес за оваа инвестиција“, рече Мицотакис на отворањето на приемот по средбата со американскиот претседател Џо Бајден.
„Нашите две нации работат заедно за климата и енергијата, на трговијата и инвестициите, на одбраната и одговорот при катастрофи и многу повеќе“, рече Бајден во својот говор на собирот во Источната соба на Белата куќа.
„Не е претерување да се каже дека денес нашето пријателство и партнерство и нашиот сојуз се поблиски и посилни отколку што биле досега“, рече тој. „Имавме одличен разговор. А опасниот дел за сите вас е што многу си се допаѓаме“.
Бајден, исто така, ја повтори пофалбата за ставот на Грција за војната во Украина, заблагодарувајќи му се на Мицотакис за „моралната храброст и јасност што ги покажавте од самиот почеток на оваа криза, осудата на руската агресија, приемот на украински бегалци“.
„Заедно, ја покажуваме моќта и капацитетот на демократиите да можат да дејствуваат во дует. И ние им помагаме на Украинците да кажат ‘не’ на руската агресија. И велиме ‘не’ на тиранијата и на идејата дека автократиите ќе ги надминат демократиите во 21-от век, бидејќи според мене тоа е она што е во прашање“, рече американскиот претседател.