Неколку членови на Форумот за демократска Македонија, вчера во Малта се сретнаа со министерот без ресор задолжен за дијаспората, Едмонд Адеми.
На средбата, заедницата на иселеници од Македонија му презентирале на Адеми дел од визиите што како проекти би можеле да се реализираат во следниот период меѓу Македонија и Малта, како презентација на македонската култура во оваа мала медитеранска земја со значителна македонска дијаспора, во година кога Валета е европски град на културата.
Министерот Адеми ја презентирал својата агенда на состаноци со дел од владините министерства на малтешката Влада, на кои рекол ќе се преземат активности со што би се потпомогнало делувањето во сите сфери на македонските државјани и реализирањето на проекти со кои би се претставила Македонија.
Адеми бил запознаен со голем дел од проблемите со кои се соочуваат македонските државјани поради немањето амбасада ниту пак конзуларно одделение.
Следната средба тие ја закажале за средината на март кога ќе се презентираат предложените проекти и ќе се финализираат кон нивна продукција во следните неколку месеци.