Министерот за надворешни работи Бујар Османи на маргините на Бледскиот стратешки форум имаше средба со Габриел Ескобар, заменик помошник државен секретар за европски и евроазиски прашања и специјален претставник на САД за Западен Балкан.
Коментирајќи ја средбата шефот на македонската дипломатија изрази задоволство од неодамна одржаниот Стратешки дијалог и првичните резултати во форма на грантови за зајакнување на владеењето на правото, културата и одбраната.
„Стратешкото партнерство меѓу двете земји се зајакнува, а билатералните односи влегуваат во нова, подинамична фаза на развој. САД даваат недвосмислена поддршка на европските интеграции на Северна Македонија и отворањето на пристапните преговори со ЕУ, како значаен влог во стабилноста и целокупниот напредокот на регионот“, подвлече тој.
Османи и Ескобар ја потврдија силната поддршка за Украина и современите демократски вредности осудувајќи ја руската воена инвазија над оваа земја. (Р.Н.)