Премиерот Зоран Заев во рамки на посетата на Брисел, денеска оствари средба со високата претставничка на Европската Унија за надворешна политика и безбедност Федерика Могерини.
Како што соопшти прес службата на Владата, на средбата Заев истакнал дека од клучно значење за поддршка на тековните напори на Владата за враќање на Република Македонија на вистинскиот пат, се посветеноста и ангажираноста на високите претставници на највисоките институции на ЕУ, како и институционалната поддршка од телата на Европската Унија.
– Очекуваме дека ЕУ ќе покаже визија и ќе обезбеди одлука за отпочнување на преговорите за пристапување во првата половина од 2018 година, нагласил Заев.
Заев говорел за примарната посветеност на Владата на РМ да се изгради модерна европска земја што ги дели европските вредности, со функционална демократија базирана на владеењето на правото и врз заеднички споделени основни вредности.
-Имаме аргументи да докажеме дека Република Македонија е најдобрата “успешна приказна” во 2017 година и може многу да придонесе за добрососедските односи, регионалната соработка, стабилноста и безбедноста на регионот на Западен Балкан и во Европа, рекол Заев.
Во соопштеието се истакнува дека тој ги искажал и очекувањата од Стратегијата за проширување на ЕУ, најавена од страна на претседателот на Европската комисија Јункер, и истакна дека едно од тие очекувања е отворање на можноста за секоја земја да напредува колку што е можно побрзо во процесот на пристапување врз основа на сопствените заслуги.
Во врска со прашањето со Грција, Заев кажал дека има една порака: Подготвеност од македонска страна за решение на ова прашање.
-Бараме помош и поддршка како да го најдеме соодветното и одржливо решение кое ќе има поддршка во двете земји, рекол Заев.
Високата претставничка на Европската Унија за надворешна политика и безбедност Федерика Могерини истакнала дека е видливи напредокот што го оствари Република Македонија за само една година, и дека тоа е добар знак и во однос на напредувањето на државата во евроинтеграциските процеси.
На средбата во Европската Комисија кај Могерини е нагласено дека претстојните месеци до првата половина на 2018 година се круцијални кога е во прашање процесот за отворање на преговорите за членство на Република Македонија во ЕУ. Посочено е и важноста, колку што е можно побргу, да се одржат средби на високо ниво меѓу Република Македонија и Република Грција.