Питер Ван Хојте, кој на покана на ЗНМ е во Скопје со цел да помогне во медиумскиот реформски процес, денеска во владата имаше средба со премиерот Зоран Заев и раководството на Здружението на новинарите.
На средбата била изразена заедничка согласност дека медиумите се меѓу најважните столбови на едно демократско општество, во какво што е определена да ја гради Македонија оваа Влада.
„Работиме и ќе работиме активно со претставниците на медиумската заедница во Македонија, со цел да поставиме долгорочно издржани, системски решенија во медиумската сфера, според најдобрите европски пракси. Се отворивме за целиот реформски процес, а тоа важи и за медиумските реформи. Ја консултираме целата експертска јавност. Го консултираме граѓанскиот сектор. Ќе ја вклучиме и опозицијата. Нашата цел е да обезбедиме МРТВ да биде кредибилен јавен сервис, професионално работење на Агенцијата за аудио и аудиовизуелни медиумски услуги, како и услови за објективно и непристрасно работење на сите други медиуми, бидејки интерес на сите граѓани е да бидат навремено и точно информирани“, изјавил премиерот Заев.
Европскиот експерт Ван Хојте оценил дека со реформската определеност ќе се отворат перспективи за квалитетен живот на граѓаните и европска иднина на државата и дека е важно разбирањето на Владата за важната улога на медиумите во демократските промени, што очекува да го види и ЕУ. Тој посочил дека Македонија е на дното по медиумски слободи во извештаите на сите релевантни европски и светски институции и организации токму поради досегашното отсуство на политичка волја да се осигура слобода на говорот, професионално новинарство и заштита на новинарите.
Претставниците на ЗНМ, Селмани и Секуловски ги соопштиле ставовите на ЗНМ и на пошироката медиумска јавност со којашто се во контакт, околу конкретни прашања поврзани со предвидените реформи во медиумите. ЗНМ бара посебно да се обрне внимание на заштита на новинарите од насилства од страна на државни институции, како и од притисоци преку нетранспарентни судски процеси, за што се потенцирани досегашни бројни примери.