Експертскиот комитет за имунизација им препорача на граѓаните на Србија кои ја примиле втората доза на вакцина против коронавирус пред најмалку шест месеци да им се даде трета, таканаречена „бустер“ доза на вакцина базирана на технологијата на РНК, како што се произведени вакцините од компаниите Фајзер и Модерна.
Се наведува дека препораката до Кризниот штаб за сузбивање на епидемијата е дадена врз основа на „неколку студии досега што покажаа дека примената на третата доза доведува до зголемување на хуморалниот имунолошки одговор“.
„Врз основа на досегашните, малубројни студии кои покажаа дека употребата на третата доза или бустер дозата на вакцината против ковид 19 доведува до зголемување на хуморалниот имунолошки одговор, експертскиот комитет за имунизација препорачува да се даде трета доза на вакцина против ковид 19 на лица кај кои поминале најмалку шест месеци од примањето на втората доза, без оглед на видот на вакцината што претходно ја примиле“, се наведува во препораката.
Тоа е првенствено кај: лица со имунодефициенција и имуносупресивни состојби, приматели на трансплантација на коскена срцевина и солидни органи и лица на хемодијализа, постари од 70 години, постари од 60 години кои трајно престојуваат во домови за стари лица и други институции за социјална грижа и вработени во здравствените и социјалните установи, како и лица кои живеат со примарна или секундарна имуносупресија, се додава во препораката.
Се додава дека третата доза на вакцината може да ја примат „сите други лица кај кои“ поминале најмалку шест месеци од давањето на втората доза.
Претходно денес, премиерката Ана Брнабиќ за ТВ Пинк ја најави седницата на Националното тело за имунизација, кое ќе даде мислење на Кризниот штаб за третата доза, врз база на што на 1 август Кризниот штаб ќе засадава и ќе даде препораки.