Според податоците на ССМ, 110.000 работници се пријавени на минимална плата од 15.200 денари.
Штрајкувачкиот одбор на ССМ донесе одлука за штрајк доколку не биде прифатен педлогот за зголемување на минималната плата на 18.000 денари на денешната средба во Владата која ќе се одржи во 16 часот.
Барањата на Синдикатот се минимална плата од 18.000 денари, скалесто зголемување на сите останати плати, како и регрес за сите вработени во јавниот сектор.
„Од ова нема отстапка. Не дека ние не сакаме, туку тоа го налага економската, енергетската и ковид кризата, сите цени поскапеа, а ние немаме како да си ги прехраниме децата“, рече претседателот на ССМ, Дарко Димовски и упати апел до социјалните партнери, Владата и работодавачите да ги прифатат нивните барања за да овозможат егзистенција за работниците.
Од ССМ велат дека со зголемувањето на минималната плата и сите останати плати, и Владата и бизнис секторот ќе имаат бенефит, бидејќи газдите ќе добијат помотивирани и позадоволни работници, а резултатот ќе бил поголем приход во компаниите.
„Државата, по основ на придонеси, ако ги земеме предвид само овие 110.000 работници со минимална плата, а знаеме дека данокот по основ на придонеси треба да биде по 25 евра плус, државата ќе добие на месечно ниво 2.750.000 евра. А ние работниците ќе добиеме достоинствена плата. Не за преживување, туку за живеење, а оваа минимална плата која ја бараме од 18.000 денари, е социјална плата за егзистенција ипод тоа неможе да прифатиме“, рече Димовски.
Советот на ССМ на протестот пред Организацијата на работодавачи донесе едногласна одлука – штрајк и други облици на притисок како што се блокирање на институции и патишта со претходна најава на штрајкувачкиот одбор доколку на средбата во 16 часот не бидат прифатени барањата доставени од Синдикатот.
(Б.Божиновска)