Самостојниот синдикат на новинарите и на медиумските работници (ССНМ) реагира на настанот кој пред два дена се случи во Штип, а на кој новинарката на радио Канал 77 Вања Мицевска беше избркана од контрапротест и покрај поседувањето на новинарска легитимација. Мицевска иако побарала заштита од полицијата, сепак и тие ја советувале дека најдобро би било таа да го напушти протестот.
„Скандалозно е некој да им забранува на новинарите да известуваат, како што ѝ се случи на колешката од радиото Канал 77, Вања Мицевска која во понеделникот била избркана од протестот на движењето ГДОМ во Штип.
Сепак, најзагрижувачко е тоа што полицајците не ја заштитиле и не ѝ го гарантирале правото да известува. Поединец и група може да мислат дека имаат право да одредуваат кој новинар да следи протест, а кој не, меѓутоа полицијата, која сите ја плаќаме за да нѐ заштити, мора да реагира на овие инциденти и да им обезбеди услови на новинарите да си ја вршат работата.“ се вели во соопштението.
Втор настан кој исто така се случил неделава е што во Велес – претставниците од велешкото Здружение на пензионери се дрзнале дел до присутните новинари да ги квалификуваат како странски соработници и платеници.
„Овој јавен напад врз професионалното достоинство на колегите е резултат на постојаните дискфалификации кои новинарите во Македонија ги трпат со години и тоа многу често од новинари било на телевизии или радија со национална концесија, било во печатените медиуми. Последната безочна дискфалификација дојде од Мирка Велиновска во весникот „Дневник”.
Кога ќе се случат вакви два големи инциденти во само еден ден и кога ниту една институција нема да реагира, јасно е зошто Македонија е на дното од сите релевантни листи што ја мерат слободата на говорот и на медиумите во светот.“, се вели во соопштението на ССНМ.