Самостојниот синдикат на ноцинари и медиумски работници остро протестира против Компанијата што ги издава и печати Утрински весник, Дневник и Вест, како и други дневни и неделни изданија, бидејќи, се вели во реакцијата, ги уценува, понижува и дискриминира новинарите, со договори за работа во кој им забранува изнесување лични ставови во комуникација на социјални мрежи, т.е Фејсбук, Твитер и други.
– Ставот од договор во кој на новинарите, божем им се сугерира, а де факто им се забранува да изразуваат политички ставови, во ситуација на штотуку завршен круг на отпуштања и намалени плати, не може да биде разбран поинаку, освен како уште еден начин за замолчување на новинарите, ограничување на слободата на говор и нарушување на основните права и слободи на човекот. Обидот на Медиа принт Македонија овие членови да се претстават како „светска пракса“, а потпишувањето на договорите „доброволно“ е крајно циничен и навредувачки, смета ССНМ.
ССНМ потсетува дека е точно дека многу светски медиуми имаат упатства за новинарите и вработените за нивното учество на социјалните медиуми, но станува збор за упатства, а не клаузули на договор за вработување кои по автоматизам значат дека нивното непочитување може да резултира со отказ.
– Воедно за „доброволноста“ на потпишувањето на ваквите договори доволно говори фактот што работодавачот во ситуација на непотпишан договор може да го отпушти работникот без какви и да е последици, појаснува ССНМ.
Компанијата од страна на ССНМ беше предупредена дека со тоа се крши член 6 од Законот за работни односи кој забранува дискриминација, се кршат неколку членови од Законот за заштита и спречување на дискриминацијата, но се кршат и уставните права и слободи загаранитарни во членовите 8, 9, 16 и 17.
Самостојниот синдикат на новинари и медиумски работници за ова ќе ја извести и меѓународната јавност, а кон компанијата МПМ најавува дека ќе ги преземе сите мерки што им стојат на располагање за да ги поништат „ваквите уценувачки, дискриминаторски и понижувачки договори за работа за новинарите“.